TFF yafafanua uchaguzi Yanga

WAKATI zoezi la uchukuaji fomu za kuwania uongozi wa klabu ya Yanga likianza leo, Kamati ya Uchaguzi ya Shirikisho la Soka Tanzania (TFF), imefafanua kuwa ni uchaguzi wa kujaza nafasi zilizo wazi na si uchaguzi mkuu.

Hatua hiyo, inatokana na baadhi ya wanachama wa klabu ya Yanga, kukiuka kanuni hizo kwa kutoa taarifa potofu kuhusiana na uchaguzi mdogo wa kuziba nafasi zilizowazi utakaofanyika Julai 15.

Mwenyekiti wa Kamati ya Uchaguzi ya TFF, Deogratius Lyatto, alisema jijini Dar es Salaam jana kwamba uchaguzi huo ni kwa ajili ya kuziba nafasi za viongozi ili kutimiza akidi na si kwa ajili ya kuchagua upya viongozi kama inavyoenezwa.

“Kuna upotoshwaji unafanywa na baadhi ya wanachama kuhusiana na uchaguzi huu, napenda ieleweke kuwa uchaguzi huo utajaza nafasi za viongozi waliojiuzulu na ile ya mjumbe mmoja aliyefariki, hivyo wanachama wa Yanga wafahamu hilo na kuzingatia,” alisema.

Mbali na hilo, mwenyekiti huyo alisema kwamba viongozi watakaochaguliwa watakaa madarakani kwa muda uliosalia kama katiba inavyoelekeza na kwa mantiki hiyo, watamaliza miaka yao minne mwaka 2014.

“TFF inaamini kuwa wajumbe wa Kamati ya Uchaguzi ya Yanga, watatekeleza wajibu na majukumu yao ya kikatiba na kikanuni, kuhakikisha kwamba klabu hiyo inajaza nafasi zilizo wazi katika mkutano mkuu wa uchaguzi kwa kipindi kilichobaki cha mamlaka ya kamati ya utendaji (ibara ya 29 ya katiba ya Yanga),” alisema.

Kwa mujibu wa Katibu wa Kamati ya Uchaguzi ya Yanga, Francis Kaswahili, zoezi la uchukuaji na urejeshaji fomu litamalizika Juni 6, huku Juni 7 hadi 13 kamati itapitia majina ya walioomba kugombea na kutangaza majina yao, wakati Juni 14 hadi 18 itakuwa ni kipindi cha kupokea pingamizi.

Aidha Juni 19 hadi 23 utafanyika usaili na kutangaza matokeo, wakati Juni 24 hadi 26 itakuwa ni kipindi cha kukata rufaa, Juni 27 hadi Julai mosi Kamati ya Uchaguzi TFF itasikiliza rufaa kama zipo, huku Julai 2 yatatangazwa majina na kampeni kuanza hadi Julai 14.

Uchaguzi huo unatokana na kujiuzulu kwa aliyekuwa Mwenyekiti Lloyd Nchunga, baada ya kushinikizwa na baadhi ya wanachama wakiongozwa na Baraza la Wazee, kwa madai ya kushindwa kuiletea mafanikio chini ya uongozi wake.

Pia nafasi zingine zitakazojazwa ni za Makamu Mwenyekiti iliyokuwa inashikiliwa na Davis Mosha ambaye alijitoa miezi michache baada ya kuchaguliwa, huku mjumbe Theonest Rutashoborwa akitangulia mbele ya haki.

Uchaguzi huo pia utajaza nafasi za wajumbe walioachia ngazi ambao ni pamoja na Mzee Yusuf, Charles Mgondo na Ally Mayay.

Kwa sasa Yanga imebaki na wajumbe wanne, Mohammed Bhinda, Sarah Ramadhan, Tito Osoro na Salum Rupia, ambao baada ya uchaguzi wataungana na viongozi wapya na kuteua wajumbe wengine watatu kwa mujibu wa katiba, hiyo inatokana na wajumbe hao wa kuteuliwa Seif Ahmed, Mbaraka Igangula na Pascal Kihanga kujiuzulu.CHANZO http://www.freemedia.co.tz/daima/habari.php?id=36572