Wanafunzi wa vyuo wavamia bodi ya mikopo, wapigwa mabomu

Polisi  jana walilazimika kutumia mabomu ya machozi kuwatawanya wanafunzi wa vyuo vikuu vya Kumbukumbu ya Mwalimu Nyerere, Chuo cha Elimu ya Biashara (CBE) na St. John's tawi la Dar es Salaam waliokwenda Bodi ya Mikopo ya Elimu ya Juu (HESLB), kufuatilia mikopo yao.

Hata hivyo, bodi hiyo imesema kwamba akaunti yake ambayo inaitumia kulipa mikopo ya wanafunzi "inasoma ziro" na kwamba hatua hiyo inasababisha ishindwe kuendelea kutoa huduma.

Kauli hiyo ilitolewa jana jijini Dar es Salaam na Mkurugenzi mtendaji wa bodi hiyo, George Nyatega alipozungumza na wanafunzi hao waliovamia bodi hiyo kumshinikiza iwalipe fedha za ada, utafiti pamoja na chakula.

Licha ya kutoa kauli hiyo, wanafunzi hawakukubaliana naye na badala yake waliendelea kushinikiza walipwe fedha ndiyo waondoke. ''Sisi tunaamini kwamba bodi hii ina fedha na inazitafuna huku ikishindwa kutulipa sisi hivyo hatutoki hapa mpaka tupate fedha zetu,'' walisema wanafunzi hao mbele ya Nyatega.

Baada ya majibishano ya saa kadhaa bila suluhu uongozi wa bodi ya mikopo ulilazimika kuita jeshi la polisi ili lisaidie kuwaondoa wanafunzi hao ambao walikuwa wakipiga kelele na kusema kwamba hawaondoki hapo mpaka walipwe fedha hizo.

Muda mfupi magari ya polisi yaliyokuwa na askari waliovalia sare na wengine nguo za kiraia yalifika katika ofisi hizo na kuwakuta wanafunzi hao wakiendelea kupiga kelele na kuwataka waondoke mara moja.

Hata hivyo, wanafunzi hao walikaidi mpaka polisi walipoanza kufyatua mabomu ya machozi ili kuwatawanya ambapo baada ya kuona imekuwa ngumu walianza kukimbia hovyo huku na kule.

Wanafunzi hao baada ya kuona hali imebadilika na mabomu yameanza kupigwa walianza kutimua mbio lakini hakuna mtu aliyekamatwa kutokana na tukio hilo wala kujeruhiwa.

Akizungumza kabla ya kupigwa mabomu mmoja wa wanafunzi hao kutoka Chuo cha St. John's, Nuru Karua, alisema fedha wanazodai ni mkopo na wanajua watazilipa lakini hajui ni kwani nini serikali imekuwa ikiwazungusha.

Awali, Nyatega alisema ofisi yake imeshaandaa malipo yote kwa ajili ya kuwalipa wanafunzi wa vyuo mbalimbali vya elimu ya juu lakini inashindwa kupeleka hundi za malipo benki kwa kuwa haina hata shilingi moja.

"Akaunti yetu ya bodi ya mikopo haina kitu ndugu wanafunzi kwa kuwa Hazina yaani serikali haijatupatia fedha sasa sisi tutawalipa kitu gani hata kama mmekuja hapa kudai fedha hizo,” alihoji Nyatega.

Alisema bodi imeshawalisha taarifa kwa Hazina kuomba fedha hizo na kwamba wamejibiwa watapatiwa wiki hii muda wowote na kuwataka wanafunzi hao kukubalina na kauli yake.

Kufuatia ukata huo, Nyatega alisema vyuo vilivyolipwa mpaka sasa ni Chuo Kikuu cha Dar es Salaam (UDSM), Chuo Kikuu cha Ardhi (Aru) na Chuo cha Usimamizi wa Fedha (IFM).

Kamanda wa Polisi mkoa wa Kinondoni, Charles Kenyela alipotafutwa kwa njia ya simu jana kuelezea tukio hilo hakutapatikana baada ya msaidizi wake kupokea simu muda wote na kusema alikuwa kwenye kikao kwa siku nzima.

CHANZO: NIPASHE